Deleite é un proxecto colectivo que naceu para darlle valor ao leite galego, garantirlle un futuro ao rural e ofrecer un produto 100% noso. Nesta décima edición do Castelo Conta, a súa colaboración chega a Casa Rodríguez e ás actividades de Xente Miúda, facendo presente no festival un leite que fala de Galicia con calidade e compromiso.
Deleite: o sabor do noso
O Castelo Conta medra cada ano grazas a alianzas que teñen moito que ver coa nosa forma de entender a cultura: próxima, feita desde aquí e con vocación de futuro. Deleite representa todo iso.
A marca naceu da man da sociedade Leite Noso, formada por gandeiras e gandeiros galegos que decidiron comercializar o seu produto sen intermediarios, asegurando prezos xustos en orixe e contratos estables. O obxectivo era claro: coidar das explotacións, do emprego no rural e da calidade do leite galego.
Hoxe, Deleite é referencia en Galicia e pioneiro en innovación: foi o primeiro en comercializar leite A2 UHT en España, resultado dun proceso de mellora continua no que o benestar animal e a calidade do produto están sempre no centro.
Nesta décima edición, Deleite acompáñanos con propostas que chegan tanto á veciñanza como aos máis pequenos: estará presente nas actividades de Xente Miúda, repartindo envases individuais de leite, e tamén na Taberna Casa Rodríguez, onde o seu leite formará parte dos cafés, das sobremesas e mesmo dos xeados elaborados con leite A2A2. É unha maneira de sumar á experiencia do festival o sabor dun produto que fala de identidade, territorio e futuro.
Deleite é unha aposta polo rural galego como espazo de modernidade e sostibilidade, un compromiso cos gandeiros e coas súas familias, e unha defensa da cultura como parte esencial da nosa identidade como pobo. Por iso, colabora con festivais, proxectos artísticos e iniciativas que, coma o Castelo Conta, buscan asegurar que as tradicións e a creatividade galega sigan vivas para as xeracións vindeiras.