Un proxecto dirixido por Hadriana Casla que recoñece ás mulleres maiores do rural galego como memoria viva e gardiás da cultura.
Así foi a presentación de ‘Mulleres que Contan’ no Castelo Conta 2025
O pasado xoves 28 de agosto, no marco da décima edición do festival, presentouse o proxecto Mulleres que Contan, dirixido por Hadriana Casla, do colectivo Grigri Projects, e impulsado polos Grupos de Desenvolvemento Rural: Asociación para o Desenvolvemento Rural Sil-Bibei-Navea, Asociación Miño Ulla, GDR Ribeira Sacra-Courel e Asociación Deloa.
A iniciativa recolle o legado do documental ‘Mulleres de Castelo’ (2024) e dá un paso máis na defensa do rural e da memoria colectiva. O seu obxectivo é claro: poñer no centro ás mulleres maiores das aldeas galegas, dándolles voz para compartir experiencias, crear rede e fortalecer vínculos comunitarios.
Durante a xornada de presentación en Castelo, participaron catro grupos de mulleres de Baroña, Manzaneda, Triacastela e Paradela, que a través de obradoiros e encontros comezaron a dar forma a un relato colectivo. Este construirase a partir das súas propias gravacións e conversas, amosando a realidade, as memorias e as fortalezas que gardan.
‘Mulleres que Contan’ busca ser unha rede de apoio e conexión entre xeracións e territorios, recoñecendo o papel destas mulleres como creadoras de comunidade e gardiás da identidade do rural galego.
O proxecto está promovido polos Grupos de Desenvolvemento Rural mencionados, en colaboración co Castelo Conta, e financiado polo FEADER no marco da Intervención Leader de Galicia (PEPAC 2023-2027).