A segunda andaina polos Nomes de Castelo leva ao grupo ata Folgueira e Xalo, dous lugares cheos de memoria e significado. A través deste percorrido colaborativo, veciños e veciñas compartirán o nome dos lugares que habitan: penedos, soutos, fontes, eiras… unha cartografía emocional que non aparece nos mapas oficiais, pero que constrúe o verdadeiro relato do territorio.
Durante o camiño, iranse anotando os topónimos para incorporalos a un gran mapa colectivo da parroquia, mentres se escoitan historias ligadas á terra e que acontecementos deixaron pegada nunha pedra ou nun sendeiro.