A unha semana da saída á venda de entradas, A Noite do Castelo Conta, protagonizada polos grandes nomes do humor galego, xa colgou o cartel de “completo”.
Un Castelo Conta que voa: a noite dos monólogos esgota entradas
Apenas unha semana despois da presentación oficial do Castelo Conta 2025, a resposta do público confirma que esta será unha edición histórica. A venda de entradas avanza a un ritmo excelente e a primeira gran confirmación chegou: a Noite do Castelo Conta xa colgou o cartel de “completo”. O espectáculo de monólogos, co que se pechará o Día Grande do festival o sábado 30 de agosto, esgotou as todas as localidades dispoñibles en apenas uns días.
Non é para menos: no escenario reuniranse algunhas das voces máis recoñecidas e queridas do humor galego: Lucía Veiga, David Amor, Quico Cadaval, Pepo Suevos, Marita Martínez, Patricia Castrillón, Gari Garrido, Oswaldo Digón, David Perdomo e Javier Veiga. Este espectáculo, presentado cada ano por Xosé A. Touriñán, é un dos grandes momentos do festival, agardado ano tras ano polo público.
Mentres tanto, continúa a bo ritmo a venda de entradas para outras actividades destacadas da programación. Aínda están dispoñibles os billetes para o concerto de Carlos Núñez, que chegará ao festival o venres 22 de agosto coa súa xira ‘Lugares Máxicos’; para a ‘A gala dos dez anos’, un espectáculo especial de aniversario que se celebrará o xoves 28; e para a noite de teatro con Somos Criminais e punto final, prevista para o venres 29. O sábado 30 tamén continúa aberta a inscrición para participar na tradicional andaina polas aldeas e nas comidas populares que terán lugar ese mesmo día.
As pulseiras ‘Todo Castelo Conta’, necesarias para acceder aos eventos dos días 23 e 24 de agosto no Monte Xalo, superan xa as 300 unidades vendidas. Tamén avanza con forza a inscrición para o Xente Miúda, pensado para as nenas e nenos. Mesmo duplicando a capacidade con respecto ao ano pasado, as prazas dispoñibles son cada vez menos, confirmando o interese das familias por unha programación que combina tradición, creatividade e respecto polo territorio.
A programación completa e o acceso á venda de entradas para as demais actividades seguen dispoñibles en www.casteloconta.gal. Non quedes sen sitio!