Ortiga revoluciona o panorama musical galego cunha das propostas máis frescas e irreverentes, convertendo a música de verbena nunha experiencia contemporánea.
Ortiga
Sábado 23 de agosto|23:00
Ortiga é o proxecto musical en solitario de Manuel González, un artista compostelán que revolucionou a escena galega cunha mestura atrevida e chea e humor. A súa música, con letras directas e divertidas, fusiona sons de verbena, cumbia, merengue e electrónica, sen deixar atrás o uso alternativo do autotune.
Co seu estilo único, Ortiga conecta co público e consegue recuperar o espírito popular das celebracións de antes, ainda que cunha estética contemporánea e irreverente. Os seus concertos son unha auténtica festa e, en efecto, a excusa perfecta para bailar, rir e cantar.
Desde o seu debut en 2019, foi quen de consolidar un público fiel e entusiasta, triunfando sobre todo entre os xóvenes, atraídos pola súa enerxía e pola súa capacidade de converter calquera lugar onde soase unha das súas cancións nunha romaría moderna.
Os seus álbumes Chicho & Sus Chichas (2019) e Sabes el Camino que Elegí (2021), son traballos que amosan a súa aposta constante por romper fronteiras estilísticas, fusionando ritmos e xéneros con naturalidade e sentido do humor. No seu último sinxelo, As Mociñas (2025), dalle outra volta ao seu son e achégase, nesta ocasión, á guaracha electrónica. Non poden pasar desapercibidas colaboracións como a que levou a cabo con Pili Pampín, xunto á que versionou as cancións máis típicas da verbena, achegándolles un toque urbano e actual.
O seu concerto promete ser un dos momentos máis festivos: un convite a deixar prexuizos fóra e entregarse á música con sentido do humor e moita liberdade. Con Ortiga, a esencia de compartir e celebrar, asegura estar máis viva que nunca no Castelo Conta.